【最後的跳燈法拉利 - Ferrari F355】
2020-08-20
2020-08-20

法拉利(Ferrari) F355,相信咁多位香港讀者,如果有返咁上下年紀,對呢款車應該都唔會陌生,因為當年嘅佢,喺唔同嘅大大小小雜誌,廣告,電視節目等等都會見到佢嘅蹤影,亦都係唔少當年嘅名人座駕。當然F355曾經推出過幾個版本,有GTS, Spider, Berlinetta 等等,各個版本都有佢自己嘅特色,不過重點都係建基於F355 Berlinetta,即係硬頂版本。

  F355 Berlinetta 於1994年推出,並於1995年生產,以取替當時嘅Ferrari 348。曾經有唔少既外國行家都有一個講法,就係F355 其實係應該當佢為348 既終極改良版,因為太多既外國行家認為348比起同期既日本對手,針對住348而開發既Honda NSX,實在有太多不足嘅地方。亦因為係改良版既關係,其實F355 個外觀上面係同348 有唔少相似嘅地方。不過呢個講法就見仁見智啦,因為其實集中喺性能上,又或者係設計線條上面,F355都係一個全新嘅款式。特別嘅係,F355 係最後一架跳燈既中置引擎(MR)法拉利。

  之所以命名為F355,係因為F355用既自然吸氣V8引擎,係3.5L,而每個缸有5個氣門,於8500 rpm時輸出最大馬力381匹,0-100km/h 只係需要4.7秒(6速手波計算),以當時既標準來講,呢個數字已經係非常標青,就算放喺今時今日,亦都絕對唔失禮。當時可以配搭六速F1 半自動波箱,亦可以配搭六速手波。你問我既話,喂梗係揀部棍波啦!導致到今時今日,雖然半自動波F355 嘅生產比例只有大概37% (其餘為手波),手波版本既價值仍然係領先。

  時至今時今日,基於F355係最後一架跳燈既MR Ferrari,亦係Classic Ferrari 既最終章,所以佢亦都被世界各地嘅收藏家視為其中一個獵物。不論係邊一個版本,F355嘅價值已經遠超10年前嘅低位,以香港為例,一架質素良好既手波F355 Berlinetta,叫價已經超過100萬,比起最低位嘅時候,大概已經升值左一倍。所以咁多位收藏家,如果要出手就快啦,因為狀態良好嘅F355只會越來越少, 係未來應該只會繼續升值。


< Back to Automall blog